Dié agterstand beteken ná ’n maand sal die agterstand sowat 3 100 wees en ná ’n jaar kan dit tot byna 36 000 groei. Die departement het onlangs gesê hoewel die agterstand met visums, kwytskeldings- en appèlaansoeke die laaste paar maande met sowat 30% gekrimp het, is dit steeds meer as 140 000.
Mbhele het op Xpatweb se jaarlikse globale mobiliteitskonferensie gesê programme is gereed om die agterstand teen Desember uit te wis. Dit sal in samewerking met die private sektor gedoen word.
Talle buitelanders met skaars vaardighede wat nodig is in die arbeidsmark, is onder die aansoekers wat wag op dokumente.
Hulle het vaardighede soos vervat in die departement se lys van kritieke vaardighede, wat as noodsaaklik geïdentifiseer is vir ekonomiese groei. Die lys het ten doel om werkers met dié vaardighede makliker toegang tot die land te gee.
Marisa Jacobs, besturende direkteur van Xpatweb, het gesê hul jongste opname toon ingenieurs en kundiges in inligtingskommunikasie en -tegnologie (IKT) is die vaardighede wat groot ondernemings die meeste elders moet werf.
Xpatweb het die uitslae van die opname op die konferensie bekend gemaak. Dit toon onder meer:
In die IKT-sektor is veral sagteware-ontwikkelaars, data-ontleders en -wetenskaplikes, spesialis-IT-bestuurders en IT-ingenieurs skaars. Volgens die 2023-’24-opname sukkel 65% van werkgewers om ambagsmanne met 3 tot 5 jaar ondervinding te werf.
Onder die skaars ambagsmanne tel elektrisiëns, passer-en-draaiers, masjienmonteurs, en gespesialiseerde instrumentmakers en kalibrasie-tegnici.
Om te verseker buitelandse aansoekers met skaars vaardighede is wettig in die land terwyl hulle wag dat hul aansoeke verwerk word, het dr. Leon Schreiber, minister van binnelandse sake, verligting tot 31 Desember aan die aansoekers toegestaan. Mbhele het gesê die samewerking met die private sektor om die agterstand uit te wis, behels bykomende hulpronbronne wat Deloitte en FNB beskikbaar stel.
PRESS RELEASE | Minister of Home Affairs to engage with business and key st...